Հարգելի Arpine, բարև Ձեզ: Քանի որ մի քանի ամիս օգտագործելուց հետո գանգատները չեն վերացել, կարելի է ենթադրել, որ կա որևէ խնդիր: Մոմիկներ կարելի է օգտագործել, սակայն ոչ շատ երկարատև, բացի այդ մոմիկները խնդիրը չեն վերացնում, այլ միայն մեղմացնում են գանգատները: Հարկավոր է դիմել գինեկոլոգի և մանրամասն հետազոտվել պատճառը պարզելու համար:

Հարգելի Meri, բարև Ձեզ: Դա ընդամենն անատոմիական առանձնահատկություն է, անհանգստանալու կարիք չկա:

Հարգելի Nare, բարև Ձեզ: Պարտադիր չէ, որ կուսաթաղանթի պատռումն ուղեկցվի առատ արյունով և ցավով: Հնարավոր է, կուսազրկում արդեն եղել է, և Դուք ուղղակի չեք զգացել: Որոշ դեպքերում, երբ կուսաթաղանթը տեղակայված է հեշտոցամուտքից բավականին հետ, կուսաթաղանթի պատռում կարող է ընդհանրապես չլինել, կամ լինել մասնակի վնասում:

Հարգելի Lili, բարև Ձեզ: Երբեմն դաշտանի ժամանակ կարող է նկատվել փորլուծություն, սակայն,, եթե դա շատ արտահայտված է, և դաշտանի օրերից բացի, այլ օրերին ևս ունեենում եք նման գանգատներ, ուրեմն խնդիրը աղիների հետ է կապված: Գաստրիտը չի կարող փորլուծության պատճառ լինել:

Հարգելի Արմինե, բարև Ձեզ: Եթե կա ինֆեկցիա, բնական է, որ բուժում պետք է ստանաք և Դուք, և Ձեր ամուսինը: Փորձեք համոզել, հակառակ դեպքում Ձեր ստացած բուժումն անիմաստ է, և որոշ ժամանակ անց գանգատները նորից ի հայտ կգան: Սեռական ճանապարհով փոխանցվող ինֆեկցիաները  լուրջ առողջական խնդիրների պատճառ կարող են դառնալ:

Հարգելի Արմինե 31, բարև Ձեզ: Եթե կա արգանդի պարանոցի էրոզիա, ցանկալի է նախ կատարել օնկօցիտոլոգիական քննություն, պարզելու համար բջիջների ատիպիզմ կա թե, ոչ: Բուժման առավել արդյունավետ միջոցը էլեկտրոկոնիզացիան է (այրումը): Դա հետագայում չի խանգարի հղիանալուն, սակայն ցանկալի չէ ծննդաբերել բնական ուղիներով: Այս դեպքում ցուցված է կեսարյան հատումը:

Հարգելի'  կայքի այցելուներ, տեխնիկական պատճառներով հարցերին պատասխանելը ժամանակավորապես հնարավոր չէր, և որոշ հարցեր, որոնց պատասխանելն այլևս ակտուալ չէ, հեռացվել են կայքից: Խնդրում ենք, եթե Ձեր հարցերը դեռևս ակտուալ են, նորից գրել:  Հայցում են Ձեր ներողամտությունը պատճառված անհարմարության համար:

Հարգելի ISKUHI, բարև Ձեզ: Կրծքագեղձերում ցանկացած բնույթի գոյացության շոշափումը, հատկապես ,եթե կա ցավ անհանգստացնող է, հարկավոր է անպայման դիմել մամոլոգի: Եթե ցավը երկկողմանի է, շատ հնարավոր է, որ դա ֆիբրոզ-օջախային մաստոպաթիա է, եթե միակողմանի է, հաշվի առնելով Ձեր տարիքը կարելի է ենթադրել, որ ֆիբրոմա է: Սակայն սրանք ընդամենը ենթադրություն են, հարկավոր է անպայման հետազոտվել: 

Հարգելի Lena, բարև Ձեզ: Եթե կատարվել է արգանդի խոռոչի քերում, հնարավոր է, որ դա լինի պատճառը, սակայն դա միանշանակ չէ:  Արգանդի խոռոչը քերելու ժամանակ վնասվում է լորձաթաղանթը, կարող է առաջանալ կպումային պրոցես: Ցանկալի է կատարել ախտորոշիչ հիստերոսկոպիա, արգանդի լորձաթաղանթի վիճակը գնահատելու համար: 

Հարգելի Nelli, բարև Ձեզ: Պետք է նշել, որ կարևոր է ոչ միայն Ձեր, այլև ամուսնու առողջական վիճակը: Բացի այդ Ձեր տարիքը փոքր չէ, ենթադրվում է, որ ամուսնու տարիքն էլ փոքր չէ: Դա կարող է պատճառ լինել, սակայն միանշանակ չէ: Եթե պլանավորում եք հղիություն,  ցանկալի է նախօրոք հետազոտվել, և Դուք, և ամուսինը, այնուհետև, եթե կարիք լինի համապատասխան բուժում ստանալ: 

Հարգելի Ani, բարև Ձեզ: Նախ պետք է նշել, որ կնոջ երկրորդային սեռական հատկանիշների լրիվ  ձևավորումն ավարտվում է 24-25 տարեկան հասակում: Բացի այդ կրծքերում գեղձային հյուսվածքը համարյա նույնն է բոլոր կանանց մոտ, իսկ ձևը և չափերը հիմնականում կախված են ճարպային հյուսվածքի առկայությունից: Եթե ֆիզիկական զարգացումը նորմալ է ընթանում, դաշտանը կանոնավոր է, անհանգստանալու կարիք չկա, առավել ևս որևէ միջոց կիրառելու: 

Հարգելի ANUSH, բարև Ձեզ: Հղիության առաջին եռամսյակում արյունային արտադրությունը, լինի դա շագանակագույն քսվող բնույթի, թե առավել ևս ալ կարմիր,  վիժման սպառնալիքի նշան է: Հարկավոր է անպայման տեղյակ պահել Ձեզ բուժող բժշկին, հնարավոր է հարկ լինի նորից հոսպիտալացվելու: 

Հարգելի ANI, բարև Ձեզ: Հղիության առաջին հավանական նշանը հենց դաշտանի ուշացումն է: Հարկավոր է հղիության թեստ անել: 

Հարգելի Hayarpi, բարև Ձեզ: Հարկավոր է նախ ճշտել Ձեր հասակը: Հնարավոր է, որ Ձեր հասակի դեպքում քաշն այնքան էլ ցածր չէ: Բացի այդ հարկավոր է ճշտել չունեք արդյոք որևէ առողջական խնդիր: Վիտամինների քաշի ավելացմանը կարող են նպաստել "B" խմբի վիտամիններ պարունակող կոմպլեքսները: Քաշը կարելի է ավելացնել նաև սննդի միջոցով:

Հարգելի Eranuhi, բարև Ձեզ: "Դիմիա"-ի և նման այլ հորմոնալ դեղերի ընդունման ժամանակ որպես այդիսին դաշտանային արյունահոսություն չեք էլ նկատի: Ամեն կուրսի վերջում կնկատեք շագանակագույն արտադրություն, կամ քիչ արյուն, որը հենց դաշտանն է: Դեղի ընդունումը դադարեցնելուց հետո դաշտանը լրիվ կվերականգնվի, հնարավոր է առաջին ամսում լինի մի փոքր առատ, անհանգստանալ պետք չէ: Շարունակեք ընդունումը: Ինչ վերաբերում է դեմքի մազակալմանը, առավել հաճախ դրա պատճառը հիպերանդրոգենեմիան է:  Ցանկալի է ստուգել անդրոգենները, շատ հնարավոր է, որ դաշտանի խանգարման պատճառը ևս հիպերանդրոգենեմիան է: Պետք է նշեմ, որ "Դիմիան" պարունակում է "Դրոսպիրենոն", որն ունի նաև հակաանդրոգենային էֆեկտ: 

Հարգելի Anna2, բարև Ձեզ: Իհարկե կարելի է վիրահատությունը կատարել ամուսնությունից առաջ, սակայն կա մեկ խնդիր` հիստերոսկոպիկ միջամտությունները կատարվում են հեշտոցային մուտքով, իսկ դա կհանգեցնի կուսաթաղանթի վնասման: Այդ պատճառով ցանկալի է կատարել միջամտությունը ամուսնությունից հետո: